കുതിരവട്ടം മാനസികാരോഗ്യ കേന്ദ്രത്തിൽ രോഗിയെ സഹതടവുകാരനായ രോഗി കൊലപ്പെടുത്തി

കോഴിക്കോട് : കുതിരവട്ടം മാനസികാരോഗ്യ കേന്ദ്രത്തിൽ രോഗിയെ സഹതടവുകാരനായ രോഗി കൊലപ്പെടുത്തി. നിലമ്പൂർ മമ്പാട് സ്വദേശിയായ സിദ്ധിക്ക് (46) ആണ് കൊല്ലപ്പെട്ടത്. ഇന്ന് രാവിലെ ആയിരുന്നു സംഭവം. ഇയാളുടെ കൂടെ തടവിൽ കഴിഞ്ഞിരുന്ന ജിയോ സക്കറിയ മുണ്ട് കൊണ്ട് കഴുത്ത് ഞെരിച്ച് കൊലപ്പെടുത്തുകയായിരുന്നു. തെരുവിൽ ഉപേക്ഷിച്ച് അലഞ്ഞു തിരിഞ്ഞു നടന്നിരുന്ന സിദ്ധിക്കിനെ കോടതി നിർദ്ദേശപ്രകാരമാണ് കുതിരവട്ടം മാനസികാരോഗ്യ കേന്ദ്രത്തിൽ പ്രവേശിപ്പിച്ചത്. സിദ്ധിക്കിനോപ്പം ജിയോയും മറ്റൊരു തടവുകാരനും കൂടെ ഉണ്ടായിരുന്നു. ഇന്ന് രാവിലെ ജിയോ അക്രമാസക്തനായി സിദ്ധിക്കിനെ മുണ്ട് കൊണ്ട് കഴുത്തിൽ മുറുക്കി കൊലപ്പെടുത്തുകയായിരുന്നു.

കുതിരവട്ടത്ത് രോഗികളെ പാർപ്പിക്കുന്നത് സംബന്ധിച്ച് മുൻപും പല ആരോപണങ്ങൾ ഉയർന്നുവെങ്കിലും വേണ്ടത്ര സൗകര്യങ്ങളില്ലാത്തത് മൂലം ആക്രമണ സ്വഭാവമുള്ള രോഗികളെ പോലും ഒന്നിച്ചായിരുന്നു താമസിപ്പിച്ചിരുന്നത്. ഇതിൽ അന്വേഷണം നടന്നു കൊണ്ടിരിക്കെയാണ് ഈ കൊലപാതകം നടന്നിരിക്കുന്നത്. ഇതു സംബന്ധിച്ച് പോലീസ് അന്വേഷണം ആരംഭിച്ചു.